gugus papi
 
ds mami het dir ja scho verrate, dass i wiedermau wott schribe. gäu, hesch de chli sorg zum mami wede heichunsch (hesch ja immer sorg, aber i säge dir das eifach us sicherheit...) i ha bis itze e coole tag gha!! mir si ade-ade gange, i ha es weggli übercho, ha chönne ga ichoufe, es het winterschueli gä für 50% und und und... aber äbe.. immer dr reihe na.
 
wo ds mami isch am morge obe abecho hets grad gseh, dass wieder öpper bim bananeboum isch gsi.. es het überau härd gha. aber i ha mis unschuldigschte lächle ufgsetzt u gstrahle - wöu, ig bis nid gsi.... när simer äbe furt, ds mami het echli stress gha, es het haut churz bevor mir hei wöue ga no puupset i mine windle. när simer du hantli gange zum döktu. ds chilli het e sprütze übercho u es entwurmigs tablettli - si isch sehr tapfer gsi!!
 
womer si heicho hani grad im büro ds jäggli abzoge u ha ds spiuzüg vor chilli gno (es isch es meitli :-) u bi i gang chräsmet - auso dert d stuefe ztüruf. aber när hani dr fähler gmacht, wöue hingeredsliege, de bini du haut wieder abegfüdlet - aber i hami chöne rette! es het nüt weh ta nüt, ds mami het mi grüemt!
 
bis dahäre isch aues tiptop gange... när isches du fasch echli dick cho für ds mami...aber weisch, es weiss mängisch o nid wases wott, kensches ja.
 
ha wiedermau dr boum umgrabe u när het ds mami gmeint mir müessi d fingerli wäsche -wasmer o prompt gmacht hei. nachem zmittag bini am bode gsi u ds mami het mir die gäubi fläsche gä - i ha dermit gspiut u ungerdesse het ds mami fertig gässe.. när ghöreni numeno 'neiiiii michelle!'
 
i weiss nid, was ds mami het gha, itze hani doch miner fingerli, d hösli, d strumpfhösli, d söckli ono grad gwäsche, es het mi dünkt, es sigi aues chli dräkig... i cha doch nüt derfür, we das gäube ding nid guet zue isch gsi. (uf au fäu hets mega gfägt, ir glungge ds plantsche). tja, itze bini haut früsch agleit u d wingle isch für einisch mau vo usse nass gsi :-))
 
när het ds mami no am chilli sis spiuzüg igsugeret... sit denn isch d chilli verschwunde. ds chilli isch äuä bös mit em mami - aber ds chilli weiss no nid, dassmer ds spiuzüg wieder hei!
 
so, i mues ga lige, ha schliesslich scho viu erläbt.
 
muntsch