hallo papi
 
itze weissi ändlich, werum du so früe geisch ga schaffe!! du wottsch au dere äktschen us wäg ga.... es isch definitiv am morge am meischte los i dere bude...
 
nachdäm i uf dis bett ha dörfe hani no herrlich gschnärchelet uf dim chüssi... derwile isch ds mami dr sven ga wecke - es het 2 alöif brucht biser ändlich isch ufgstange. u weisch, was är gseit het werum är nid sigi ufgstange?? är heigi tröimt är legi sich scho a... :-))
 
aber när isches dalidali gange: är isch sogar schnäuer fertig gsi mit morgeässe aus ds mami - när het är no chli dörfe spiele. ir zwüschezyt hani leider ufmüesse... grad am afang hani chli bauget aber när hani scho wieder afa strample, woni gmerkt ha, dass mir use gö!
 
vor luter ufregig hani no ids hösli gmacht - uiii hättisch ds mami söue gseh: mit wehenden haaren isches ufegsecklet u het mi gwicklet - mitemene stinkfudi gönger mir schliesslich nid wäg.
 
mir si sooo pünktlich gsi, dass kener ching me ufem pouseplatz si gsi - dr brüetsch het gmeint, är sig äuä dr erscht, mir sige viu ds früech....
 
ds näsi louft, i niesse u hueschte tueni ono... dr dokter het gmeint, i söui am haubi 12 schnäu verbii cho... evtl. träffe mir üs ja de uf dr strass?
 
de gömer haut nid zum grosi - ersch morn.
 
u weisch was, papi?? i bi z erschte mau alleini imene wägeli ghöcklet im migros, läck het das gfägt!! aber itze bini würklich no müed u bi scho wieder uf dim chüssi im bettli am probiere ds pfüsele.
 
muntsch u schaff nid ds fescht!